د پوهنتون اداري کارکوونکو ته د تعرفې هيئت قانون په هکله د پوهاوي سېمينار داير شو
دغه يو ورځنی سېمينار چې د سيد جمال الدين افغاني پوهنتون د مالي او اداري چارو معاونيت په نوښت جوړ شوی ؤ؛ د پوهنتون مشرتابه او اداري کارکوونکو په کې برخه لرله. د سېمينار په پرانېسته کې د پوهنتون رييس شيخ عبدالمالک محسن وويل چې د مشرتابه عالي مقام له لوري ټول قوانين، فرامين او حکمونه د شريعت په رڼا کې او ټولنې د خير لپاره صادرېږي نو پر موږ يې منل او پلي کول لازمي دي. ورپسې د پوهنتون علمي څېړنو آمر او د شرعياتو پوهنځي استاد پوهنمل دوکتور محمدسليم کريمزي د ياد قانون ټولې مادې وار په وار تشرېح او د گډونوالو پوښتنې يې ځواب کړې.
د يادونې ده چې د تعرفې هيئت قانون د مشرتابه عالي مقام له لوري په(۱) مقدمه، (۳) بابونو، (۲) فصلونو او(۲۱) مادو کې توشېح شوی او د تعرفې هيئت د مسؤليتونو او صلاحيتونو په هکله په کې حکمونه صادر شوي دي. ياد سېمينار د پوهنتون مالي او اداري چارو مرستيال حافظ مولوي محمدعثمان سعيد له لوري په دُعايه کلماتو سره پای ته ورسېد.
