د پوهنتون محصلينو ته د انساني خلقت مقصد او د انساني ژوند اهميت تر سرليک لاندې علمي سېمينار وړاندې شو
د سيد جمال الدين افغاني پوهنتون د لیلیې په جامع مسجد کې د محصلانو چارو معاونيت تر چتر لاندې د محصلانو د خدمتونو او همغږۍ آمریت په نوښت د انسان د پیدایښت مقصد او د انساني ژوند اهمیت په اړه د شرعیاتو پوهنځي استاد پوهنیار محمدوسيم حبيبي له لوري د پنځهگونو پوهنځيو سلگونه تنو محصلینو ته معلوماتي سېمینار وړاندې شو. پيل کې د دعوت او ارشاد آمر مولوي خليل الله معصوم د وخت او صحت په ارزښت خبرې وکړې او محصلين يې مخاطب کړل چې په خپلو درسونو کې په پوره کوښښ سره، د خپل نظام او کورنۍ هيلو ته ځانونه ورسوي. ورپسې د شرعیاتو پوهنځي د عقيدې څانگې استاد پوهنیار محمدوسيم حبيبي له لوري د انساني خلقت مقصد او د انساني ژوند اهميت په اړه بحث وشو او ويې ويل چې پېريان او انسانان يوازې د عبادت لپاره پيدا شوي او د انسان د خلقت هدف د علم حصول دی. نوموړي په خپلو خبرو کې قوي عقیده، نېک اعمال، حق باندې عمل او بل ته رسول او په دې لار کې صبر او استقامت د انساني ژوند مهم اصول ياد کړل. د سېمینار برخهوالو محصلانو د استاد خبرې د فکري وېښتيا او د هدفمن ژوندانه په برخه کې مهمې يادې کړې.
