له اقتصاد پوهنځي۹۲ کادرونه فارغ او د ټولنې خدمت ته وړاندې شول
سيد جمال الدين افغاني پوهنتون د اقتصاد پوهنځي د لېسانس په کچه تر لوړو زدهکړو وروسته(۹۲) دوه نوي تنه محصلين فارغ او د ټولنې خدمت ته وړاندې کړل.
په همدې موخه ترتيب شوې غونډه کې چې د پوهنتون په تالار کې جوړه شوې وه، د ياد پوهنتون رييس شيخ عبدالمالک محسن، د پوهنتون مرستيالانو، کونړ ولايت د ځېنيو ادرو مسؤلينو، د پوهنځيو رييسانو، استادانو، د پوهنتون اداري کارکوونکو، فارغېدونکو محصلينو او هغوی د کورنیو غړو برخه لرله.
پيل کې د قرآن کريم د مبارکو آیاتونو تر تلاوت وروسته د اقتصاد پوهنځي رييس پوهنيار حامد احمد مراد د غونډې گډونوالو ته د ښه راغلاست ترڅنگ؛ فارغېدونکو محصلينو ته په خطاب کې وويل: چې کورنۍ، ټولنه او نظام مو د خدمت په تمه دی، نو د دې لپاره کلکه اراده وکړئ او لوړې موخې وټاکئ.
ورپسې د پوهنتون رييس شيخ عبدالمالک محسن فارغېدونکو محصلينو ته مبارکي وويله او هغوی يې مخاطب کړل چې په خپله حاصله کړې پوهه، تجربو او وړتياوو باور وکړي او د هېواد په اقتصادي وده کې خپل مسؤليت په ښه ډول اداء کړي.
نوموړي په خپلو خبرو کې د لوړو زدهکړو وزارت او په ځانگړي ډول د پوهنتون له وروستيو لاسته راوړنو يادونه وکړه چې له امله يې په تحصيلي نظام کې د پام وړ ښهوالی راغلی دی.
په غونډه کې کونړ ولايت د اقتصاد رييس مولوي عبدالله همت، د صنعت او سوداگرۍ رييس مفتي محمد يوسف، محاکمو رياست د مدني دېوان رييس مفتي محمد شعيب حنفي، د احصايې او معلوماتو رييس مولوي عبدالغفار ذکي، فارغېدونکو محصلينو د کورنيو په استازۍ قاري ګل زاده او د محصلينو په نمايندهگۍ نوشاد مشواڼي هم ويناوې وکړې.
ياده غونډه فارغانو ته د تصدیق پاڼو له وېش وروسته په دُعايه کلماتو سره پای ته ورسېده.
