پوهنتون د رييس شيخ عبدالمالک محسن په مشرۍ؛ پوهنتون د ستراتيژيک پلان جوړونې بورډ ناسته وکړه
په ياده کاري ناسته کې د پوهنتون علمي چارو مرستيال پوهندوی ميرويس ستانکزي، د محصلانو چارو مرستيال پوهنمل علي احمد بهار، د علمي څېړنو او مجلې مرستيال پوهندوی دوکتور سيد اصغر هاشمي، د مالي او اداري چارو مرستيال قاري رحمن الله صادق او پوهنتون د ستراتيژيک پلان بورډ غړو گډون درلود چې په کې د ستراتيژيک پلان جوړونې لپاره د ترتيب شويو پوښتنليکونو په واسطه له بهرني او داخلي محيط څخه را ټول شوي معلومات تحليل او پر پايلو يې بحث او پرېکړې وشوې.
پيل کې د سيد جمال الدين افغاني پوهنتون رييس د ښه راغلاست ترڅنگ، د ستراتيژيک پلان د ترتيب پر اهميت او ارزښت خبرې وکړې او همداراز يې د بورډ غړو ته په دې تړاو لازمې سپارښتنې او لارښوونې وکړې.
ورپسې د اقتصاد پوهنځي استاد او د ياد بورډ غړي پوهنيار عمران رفيق له لوري د تحليل شويو پوښتنليکونو پايلو او شننې په تړاو پرېزنټېشن وړاندې شو چې د بورډ غړو پرې بحث او پرېکړې وکړې.
غونډه د خير په دُعا سره پای ته ورسېده.
