پوهنتون رئيس د محصلينو له ليليې څخه لیدنه او څارنه وکړه
د سيد جمال الدين افغاني پوهنتون رئيس الحاج مولوي عبدالواسع منصور، د مالي او اداري چارو مرستيال حافظ مولوي محمدعثمان سعيد په ملتيا د محصلينو له ليليې څخه د لیدنې په لړ کې د مسؤلينو او محصلينو ستونزې واورېدې او هغوی ته يې د حل ډاډ ورکړ. نوموړي هغوی ته سپارښتنه وکړه چې د خوړو او چاپېريال پاکوالي ته پوره توجه وکړي او همداراز د اجناسو تسليمېدو پر مهال د جنس کيفيت او د غذا پخولو پر وخت نظافت ته جدي پاملرنه وکړي. د ليليې کارکوونکو د پوهنتون د رئيس په ورتگ خوښي وښوده او محصلينو ته يې د غوره خدمتونو د وړاندې کولو ډاډ ورکړ.
د يادونې وړ ده چې الحاج مولوي عبدالواسع منصور د يادې ليدنې په ترڅ کې د کونړ ولايت د ارزاقو شرکت له مسؤل سره هم ناست وکړه او له هغوی يې وغوښتل چې د ليليې هغه ستونزې چې د ياد شرکت مربوط کېږي ژر تر ژره حل کړي.
