پوهنتون کې د ځنگلونو، اوبو او هوا د پېژندنې او ارزښت په تړاو يو ورځنی علمي سېمينار داير شو
نن ورځ د سيد جمال الدين افغاني پوهنتون د غونډو په تالار کې د محصلانو چارو معاونيت تر چتر لاندې د محصلانو د خدمتونو او همغږۍ آمريت له لوري او د کرنې پوهنځي په همکارۍ د ځنگلونو، اوبو او هوا د پېژندنې او ارزښت په تړاو د پوهاوي يو ورځنی علمي سېمينار داير شو چې د پوهنتون رهبرۍ، د ځېنو ولايتي ادارو استازو، د پوهنځيو رييسانو، استادانو او سلگونو محصلينو په کې برخه لرله.
پيل کې د قرآن کريم د مبارکو آیاتونو تر تلاوت وروسته د پوهنتون رييس شيخ عبدالمالک محسن گډونوالو ته د ښه راغلاست ترڅنگ وویل:”دا چې ځنگلونه، اوبه او هوا د الله ﷻ ستر نعمتونه دي نو بايد په استعمال کې يې له ډېر احتياط څخه کار واخلو او له اسراف څخه ځان وساتو. " نوموړي په خپلو خبرو کې د ياد سېمينار له تنظيموونکو مننه وکړه او زياته يې کړه چې د داسې علمي سېمينارونو لړۍ به جاري وساتي.
ورپسې د کرنې پوهنځي استادانو هر يو: پوهنيار شاهدالله امن(د ځنگلونو ارزښت، پر وړاندې يې شته ستونزې او حل لارې)، پوهنمل امين الله نورزي(د اوبو سرچينو ساتنه، اهميت، ورپېښ گواښونه او حل لارې) او پوهنيار سيد رحمت الله سادات(د هوا پېژندنه، ککړوونکي عوامل او د ساتنې لارې چارې)؛ تر سرلیکونو لاندې پرېزنټېشنونه وړاندې کړل او د گډونوالو پوښتنې يې ځواب کړې. په اخر کې ياد علمي سېمينار د محصلانو د خدمتونو او همغږۍ آمر قاري مطيع الله مسرور په لنډې وينا او دُعايه کلماتو سره پای ته ورسېد.
