پوهنتون کې د څېړنې په تړاو دوه ورځنی ورکشاپ دایر شو
دغه روزنيز ورکشاپ چې د څېړنې په برخه کې پر دوه بېلابېلو موضوعاتو د سيد جمال الدين افغاني پوهنتون د علمي څېړنو او مجلې معاونيت او د مسلکي زدهکړو پرمختیايي مرکز په همغږۍ د پوهنتون معلوماتي ټکنالوژۍ په مرکز کې جوړ شوی ؤ، د سيد جمال الدين افغاني پوهنتون او د نورستان لوړو زده کړو مؤسسې استادانو په کې برخه لرله.
د ورکشاپ په پرانيسته کې د سيد جمال الدين افغاني پوهنتون رييس شيخ عبدالمالک محسن د څېړنې پر اړتيا او ارزښت هر اړخيزې خبرې وکړې او زياته يې کړه چې د ورکشاپ گډونوال دې له دې فرصت څخه د خپلې مسلکي پوهې او وړتیا په لوړونه کې اعظمي استفاده وکړي.
ياده دې وي چې د دې دوه ورځني ورکشاپ په ترڅ کې به د سيد جمال الدين افغاني پوهنتون د علمي څېړنو او مجلې مرستيال پوهندوی دوکتور سيد اصغر هاشمي له لوري(په ټولنيزو علومو کې د علمي او څېړنيزې مقالې منځپانگيزه شننه) او د زراعت پوهنځي استاد پوهنمل دوکتور احمد راتب شرافت له خوا(په څېړنه کې د سافټوير په مرسته ماخذ ښودنه) تر سرليکونو لاندې پر يادو موضوعاتو پرېزنټېشنونه وړاندې شي او همداراز د گډونوالو پوښتنو او ازاد بحث ته کافي وخت ځانگړی شوی دی.
