پوهنتون کې محصلينو د عملي زده کړو په موخه تمثيلي محکمه جوړه شوه
سيد جمال الدين افغاني پوهنتون د شرعياتو پوهنځي له لوري د محصلينو د عملي زده کړو د ترسراوي په موخه د ياد پوهنځي محصلينو پر مټ تمثيلي محاکمه د پوهنتون مشرتابه، کونړ ولايت اړوند ادارو رييسانو، د پوهنتون استادانو او محصلينو په شتون کې ترسره شوه.
تمثيلي محکمې د مراسمو په پيل کې د سيد جمال الدين افغاني پوهنتون ريیس پوهنمل محب الله محب له شرعياتو پوهنځي څخه مننه وکړه چې د محصلينو نظري زده کړو ترڅنګ عملي زده کړو ته هم ډېر پام کوي، نوموړي وويل چې په نږدې راتلونکي کې به د لوړو زده کړو وزارت او پوهنتون د پلان له مخې ټولو پوهنځيو د محصلينو عملي زده کړو لپاره امکانات برابر شي.
د شرعياتو پوهنځي رييس پوهندوی خان محمد خدرخېل، کونړ ولايت د محاکمو رييس مولوي عزيز الرحمن ياسر، شهري محکمې رييس مولوي محمد ايوب قلم او د عدليې رييس مفتي عبدالستار حماس په خپلو خبرو کې د محصلينو عملي زده کړو لپاره د داسې تمثیلي برنامو ترسره کول ډېر اړين وبلل.
وروسته د شرعياتو پوهنځي محصلينو له لوري تمثيلي محاکمه په ښه شان ترسره شوه، چې د ګډونوالو له لوري د ځانگړې پاملرنې وړ وگرځېده.
په پای کې د شرعياتو پوهنځي استاد پوهنيار عبدالرحمن عابد ياده تمثيلي محاکمه مثبته وارزوله.
