د پوهنتون عمومي رئيس د روان خزاني سمستر له تدریسي بهیر څخه لیدنه او څارنه وکړه
د سيد جمال الدين افغاني پوهنتون عمومي رئيس مولوي عبدالواسع منصور، د دعوت او ارشاد آمريت مسؤلينو په گډون د يو پلاوي په ملتيا؛ د لوړو زدهکړو وزارت د روان کال څلورمې گڼې رهبري شورا د ۱۰ بند پرېکړې له مخې د اقتصاد او زراعت پوهنځيو له روان تدریسي بهیر څخه لیدنه او څارنه وکړه. د دغې څارنې په ترڅ کې د پوهنتون عمومي رئيس د يادو پوهنځيو د تدریسي بهیر د څارنې او ارزونې تر څنگ؛ د محصلینو ستونزې هم واورېدې، هغوی ته يې اصلاحي لارښوونې وکړې او د ستونزو د حل ډاډ يې وکړ. همداراز د يادې ليدنې پر مهال د پوهنتون مشرتابه استادانو او د پوهنځيو مسؤلینو ته د محصلينو د مسلکي، فکري او اصلاحي روزنې، د نصاب پلې کېدو، کورس پالیسيو او محصلينو د حاضرۍ په برخه کې جدي لارښوونې او سپارښتنې وکړې، چې د هغوی له لوري د بشپړ تطبيق ډاډ ورکړل شو.
