کرنې پوهنځي د ممتازو محصلینو د ستاينې په پار غونډه وشوه
سيد جمال الدين افغاني پوهنتون د کرنې پوهنځي ممتازو محصلینو د ستاينې په پار غونډه جوړه شوه.
ياده غونډه چې د کرنې پوهنځي په نوښت جوړه شوې وه په کې د پوهنتون مالي او اداري چارو مرستيال قاري رحمن الله صادق، د کرنې پوهنځي رييس پوهندوی محمد حسن محمدي، د اقتصاد پوهنځي رييس پوهنيار حامد احمد مراد، د کرنې پوهنځي استادانو او محصلينو برخه لرله.
د پوهنتون مالي او اداري چارو مرستيال قاري رحمن الله صادق په خپلو خبرو کې ممتازو محصلينو ته مبارکي وويله او هغوی يې د تحصيلي ډګر اتلان وبلل.
د کرنې پوهنځي رييس پوهندوی محمد حسن محمدي په خپله وينا کې د ياد پوهنځي له ټولو استادانو مننه وکړه چې د محصلينو په روزنه کې يې پوره زيار ګاللی دی.
غونډه ممتازو محصلينو ته په ستاينليکونو ورکولو او دُعايه کليماتو سره پای ته ورسېده.
