سيد جمال الدين افغاني پوهنتون د اقتصاد پوهنځي ۱۱۵ تنه محصلين فارغ او د ټولنې خدمت ته وړاندې کړل

سيد جمال الدين افغاني پوهنتون د اقتصاد پوهنځي د لېسانس په کچه تر لوړو زده کړو وروسته ۱۱۵ تنه محصلين فارغ او د ټولنې خدمت ته وړاندې کړل.

۸ مه، جمادی الاول، ۱۴۴۵ هـ . ق

په همدې موخه ترتيب شوې غونډه کې چې د پوهنتون په تالار کې جوړه شوې وه، د دې پوهنتون رييس پوهنمل محب الله محب، د پوهنتون علمي چارو مرستيال پوهندوی ميرويس ستانکزي، د مالي او اداري چاري مرستيال قاري رحمن الله صادق، ننکرهار پوهنتون د اقتصاد پوهنځي رييس پوهنوال محمد صادق رهنما او د دې پوهنځي استادانو، د سيد جمال الدين افغاني پوهنتون د بېلابېلو پوهنځيو رييسانو او استادانو، د پوهنتون اداري کارکوونکو، فارغېدونکو محصلينو او هغوی د کورنیو غړو برخه لرله.

پيل کې د قرآن کريم د مبارکو آیاتونو تر تلاوت وروسته د اقتصاد پوهنځي رييس پوهنيار حامد احمد مراد د غونډې گډونوالو ته د ښه راغلاست ترڅنگ؛ فارغېدونکو محصلينو او د هغوی کورنيو ته مبارکي وويله او فارغېدونکي محصلين يې مخاطب کړل چې کورنۍ، ټولنه او نظام مو له تاسو د خدمت تمه لري، نو د دې لپاره کلکه اراده وکړئ او لوړې موخې وټاکئ.

ورپسې د پوهنتون رييس پوهنمل محب الله محب فارغېدونکو محصلينو ته وويل: تاسو په خپله اخېستل شوې روزنه، تر لاسه کړو وړتياو او پوهې باور وکړئ؛ موږ پر تاسو باور لرو، چې د هېواد په اقتصادي وده کې به رغنده رول ادا کوئ .

نوموړي د اقتصاد پوهنځي له وروستيو لاسته راوړنو مننه وکړه چې له امله يې د سيد جمال الدين افغاني پوهنتون د افغانستان اقتصادي پرمختيا په ملي کنفرانس کې، چې د لوړو زده کړو محترم وزارت له لوري په پکتيا پوهنتون کې جوړ شوی ؤ؛ دويم مقام خپل کړ.

نوموړي فارغېدونکو محصلينو ته په خطاب کې وويل، چې د نظام مشران مو د هېواد اقتصادي ودې لپاره ستاسو ګټورو طرحو ته په ارزښت او لومړيتوب قايل دي، نو په دې برخه کې خپل مسؤليت ادا کړئ.

غونډې ته د ياد پوهنتون علمي مرستيال پوهندوی ميرويس ستانکزي په خپلو خبرو کې اقتصادي ازادي د ټولنې حقيقي ازادي وبلله او فارغېدونکي محصلين يې خپلو مسؤليتونو ته ځير کړل.

هغه هېوالوالو ته ډاډ ورکړ، چې دا فارغېدونکي مسلکي کادرونه په اسلامي روحيه او د اوسني عصر له غوښتنو سره سم په اقتصادي سکتور کې روزل شوي دي.

په غونډه کې د ننګرهار پوهنتون استاد پوهنوال حمدالله نظامي، فارغېدونکو محصلينو د کورنيو په استازيتوب مولوي نازک مير ايوبي او د محصلينو په نماينده‌گۍ قاري صبغت الله هم ويناوې وکړې.

ياده غونډه فارغانو ته د تصدیق پاڼو له وېش وروسته په دُعايه کلماتو سره پای ته ورسېده.