د پوهنتون استادانو او اداري کارکوونکو ته د ناسمو رواجونو مخنيوي(۱۷) گڼه فرمان په هکله د پوهاوي درې ورځنی سېمينار پيل شو
دغه درې ورځنی سېمينار چې د سيد جمال الدين افغاني پوهنتون د علمي چارو معاونيت په نوښت د شرعياتو پوهنځي په همکارۍ او د فرهنگي چارو کمېټې په هلو ځلو د پوهنتون د غونډو په تالار کې داير شو؛ د پوهنتون رهبرۍ، استادانو او اداري کارکوونکو په کې برخه لرله.
پيل کې د پوهنتون رييس په خپلو خبرو کې د سېمينار اهميت او ارزښت بيان کړ او په پوهنتونونو کې يې د دا ډول علمي پروگرامونو دايرېدل مهم او گټور وبلل. نوموړي زياته کړه چې ټول مسؤلين او منسوبين پر دې مکلف دي چې د مشرتابه عالي مقام پر حکمونو او فرمانونه ځانونه پوه کړي او د ټولنې نورو وگړو ته يې ورسوي.
ورپسې د پوهنتون علمي چارو مرستيال قاضي عبدالهادي فضلي په خپلو خبرو کې اطاعت او وحدت د ټولنې د هوساينې لپاره ډېر مهم وبلل او زياته يې کړه؛ دا چې د مشرتابه عالي مقام له لوري ټول حکمونه او فرمانونه د اسلامي شريعت په رڼا کې صادرېږي نو په مسلمه امت يې منل واجب دي.
د سېمينار په لومړۍ ورځ د پوهنتون علمي څېړنو آمر او د شرعياتو پوهنځي استاد پوهنمل دوکتور محمدسليم کريمزي د ياد فرمان لومړۍ برخې په اړه چمتو کړي معلومات ارايه کړل او مادې يې وار په وار تشريح کړې او په پای کې يې د گډونوالو پوښتنو ته ځوابونه ورکړل.
