د کونړ مرستيال والي او علماوو شورا د رييس په گډون د سيد جمال الدين افغاني پوهنتون د علمي شورا فوق العاده ناسته وشوه
ياده فوق العاده ناسته چې پوهنتون د مسلکي پراختيا آمريت اړوند د غونډو په تالار کې وشوه، د کونړ مرستيال والي الحاج مولوي عبدالله حقاني، د علماوو شورا رييس شيخ عبدالقهار صديقي، د سيد جمال الدين افغاني پوهنتون رييس شيخ عبدالمالک محسن، د پوهنتون مرستيالانو، د پوهنځيو ريیسانو او استادانو په کې برخه لرله.
پوهنتون رييس د پرانیستې وینا پر مهال په اسلامي شريعت کې د شورا پر مقام، ارزښت او اهميت هر اړخيزې خبرې وکړې او د پروان پوهنتون په ملي کنفرانس کې د سيد جمال الدين افغاني پوهنتون د لومړي مقام خپلولو له کبله ټولو منصوبينو ته مبارکي وويله او دا وياړ يې د هغوی د زيار پايله وبلله. ورپسې د پوهنتون علمي چارو مرستيال قاضي عبدالهادي فضلي له لوري د پوهنتون وروستيو لاسته راوړنو په تړاو چمتو شوی معلوماتي پرېزېنټېشن وړاندې شو او له راغلو مشرانو سره يې د پوهنتون غوښتنې او وړانديزونه شريک کړل.
ناستې ته د کونړ مرستيال والي په خپلو خبرو کې د سيد جمال الدين افغاني پوهنتون په وروستيو لاسته راوړنو خوښي وښوده او په دې برخه کې يې د پوهنتون د مشرتابه هلې ځلې وستايلې. نوموړي ټولو مسؤلينو ته لارښوونه وکړه چې د خدمت په برخه کې د الله ﷻ رضاء، د نظام پياوړتيا او اخلاص له پامه ونه غورځوي او محصلين بايد د اسلامي لارښوونو په رڼا کې په اخلاقي او علمي بڼه سمبال وروزي او د هغوی سالمې فکري او علمي روزنې ته پوره متوجه شي. همداراز مرستيال والي صیب د پوهنتون وړانديزونو، غوښتنو او ستونزو ته د رسېدنې په برخه کې د پوره همکارۍ ژمنه وکړه.
په دغه کاري ناسته کې پر يو شمېر علمي او څېړنيزو موضوعاتو بحث او پرېکړې وشوې او همداراز د يادې ناستې په لړ کې د پوهنتون رياست مقام له لوري د علمي چارو او د علمي څېړنو او مجلې مرستيالان، د پوهنځيو رييسان، د پوهنتون ځينې آمرين او استادان د ښو خدمتونو له کبله وستايل شول. ياده ناسته د خیر په دُعا پای ته ورسېده.
