تبدیلۍ په اړه د لوړو زده کړو وزارت د خصوصي محصلانو چارو ریاست خبرتیا!
ټاکل شوې ده چې د شنبې په ورځ (10/6/1445هـ.ق ، 2/10/1402هـ.ش) نېټه له یوه خصوصي تحصيلي بنسټ څخه بل ته او یا له امارتي(دولتي) تحصيلي بنسټ څخه خصوصي تحصيلي بنسټ ته د تبديلیو د فورمو د وېش لړۍ پيل شي.
داوطلبان کولای شي چې د لاندې شرطونو په نظر کې نیولو سره د تبديلۍ فورمه ترلاسه کړي:
1: یو محصل په ټوله تحصيلي دوره کې يوازې یو ځل د تبديلۍ حق لري، د مخکېنۍ تبديلۍ د درلودلو په صورت کې د دويمې تبديلۍ حق نه لري.
2: له یوه خصوصي تحصيلي بنسټ څخه بل ته او یا له امارتي(دولتي) تحصيلي بنسټ څخه خصوصي تحصيلي بنسټ ته هر کال یوازې د(جدې او دلوې) په میاشتو کې تبدیلي کېږي.
3: هغه محصل چې په لومړي پوهنتون کې له دوو څخه په زیاتو مضمونونو کې عدم کريډېټ(چانس) وي، تبدیلي نه شي کولی.
4: د تحصيل په وروستي کال کې په همغه ولایت کې تبديلي نه شي کېدای.
5: د تحصيل په وروستي کال کې له مؤسسې څخه پوهنتون ته تبدیلي نه شي کېدای.
6: تبديلي يوازې په عین صنف، سمسټر او څانګه کې کېدای شي.
د تبديلۍ د فورمو وېش په (10/ 6/1445هـ.ق ، 2/10/1402 هـ.ش) نېټه پيل او په (10/7/1445هـ ق ، 30/10/1402هـ ش) نېټه پای ته رسېږي.
داوطلبان کولای شي چې په ټاکلې موده کې د لوړو زده کړو وزارت له ويب پاڼې او یا د دغه وزارت له پذيرش دفتر څخه د تبديلۍ فورمه ترلاسه کړي.
