د تنویر لوړو زده کړو خصوصي مؤسسې د جوازه نه لرونکي(شرعیاتو) پوهنځي له فارغانو څخه د سویې د تثبیث ازموینه واخیستل شوه
د لوړو زده کړو وزارت څخه د کیفیت د تضمین او اعتبار ورکولو د ريیس په مشرۍ راغلي پلاوي د کونړ سید جمال الدین افغاني پوهنتون د رهبرۍ او استادانو په ملتیا د تنویر لوړو زده کړو خصوصي مؤسسې د جواز نه لرونکي شرعیاتو پوهنځي څه له پاسه(۴۰۰) فارغانو څخه د سویې د تثبیت ازموینه واخیسته، چې بریالي ګډونوال به یې د تحصیلي اسنادو ترلاسه کولو په موخه جواز لرونکو لوړو زده کړو خصوصي بنسټونو ته معرفي شي.
ازموینې د پیل په مراسمو کې د سيد جمال الدين افغاني پوهنتون رييس پوهنمل محب الله محب راغلي پلاوي او د غونډې ټولو ګډونوالو ته د ښه راغلاست تر څنګ؛ فارغانو ته ازموينې د پوره نظم ساتلو سپارښتنه وکړه.
لوړو زده کړو وزارت، د کیفیت د تضمین او اعتبار ورکولو ريیس استاد شاکر الله وحيدي وويل: دا ازموينه د ځانګړي طرزالعمل په رڼا کې په پوره شفافيت سره اخيستل کېږي چې حق به حقدار ته وسپارل شي.
غونډې ته د لوړو زده کړو وزارت د نظارت او ارزيابۍ رييس انجينير سيد اسماعيل روحاني او د تنویر لوړو زده کړو خصوصي مؤسسې مؤسس استاد زاهد هم په خپل وار خبرې وکړې.
د یادونې وړ ده؛ هغه خصوصي لوړو زده کړو بنسټونه، پوهنځي، ديپارتمنتونه، دويمې او درېیمې شعبې چې د لوړو زده کړو وزارت له خوا یې د فعالیت جواز نه درلود، د ا.ا.ا د ریاست الوزرا قدرمن مقام د حکم پر اساس یې فعالیت بند شوی او برحاله محصلان یې جواز لرونکو لوړو زده کړو خصوصي بنسټونو ته تبدیل شوي او له فارغانو یې د سویې د تثبیت ازموینه اخیستل کېږي، چې تر بریالیتوب وروسته به د جواز لرونکو لوړو زده کړو خصوصي بنسټونو له لارې د فراغت اسناد ورکول شي.
