د پوهنتون مشرتابه، استادانو او محصلينو د کونړ ولايت د کورنيو توليداتو او محصولاتو په ملي نندارتون کې گډون وکړ
ياد نندارتون چې(د هېواد توليد- د هېواد وياړ) تر عنوان لاندې د صنعت او تجارت وزارت په همکارۍ د تسل ملي او نړيوالې نندارتوني کمپنۍ له لوري په کونړ ولايت کې پرانيستل شوی، د صنعت کارانو سربېره په کې د سيد جمال الدين افغاني پوهنتون د محصلينو څېړنيزې پروژې، نوښتونه او د استادانو تأليفات نندارې ته کېښودل شوي دي.
د ياد نندارتون د پيل په مراسمو کې د کونړ مرستيال والي مولوي عبدالله حقاني، د علماوو شورا رييس شیخ عبدالقهار صديقي او د ولايتي ادارې ځينو مسؤلينو په خپلو ويناوو وويل: دا چې هېواد مو له بشپړ امنيت څخه برخمن دی نو سوداگر دې د هېواد په داخل کې پانگه اچونه وکړي او همداراز دې په خپلو توليداتو کې کيفيت ته پوره پاملرنه وکړي.
غونډې ته د سيد جمال الدين افغاني پوهنتون رييس شيخ عبدالمالک محسن په خپلو خبرو کې د نوښتگرو محصلينو او ځوانانو له هڅو او لاسته راوړنو مننه وکړه او ډاډ يې ورکړ چې نظام يې ابتکاراتو ته ارزښت او قدر ورکوي او د مستعدو ځوانانو له هڅو او لاستهراوړنو پوره ملاتړ کوي.
د يادونې وړ ده، چې په دغه نندارتون کې د محصلينو او زدهکوونکو نوښتونه، داخلي توليدات، لاسي صنايع، حيواني او کرنيز محصولات نندارې ته وړاندې شوي، چې تر پنجشنبې ورځې به دوام وکړي.
